...nemet evit hini 2018 (amañ da heul) a oa aozet e Plogoneg (estreget ar "murder party"). Gouel 2017, an hini gentañ aozet gant an "Inter Kuzulioù" a dremene e Ploveilh. Gouel 2019 e Plugüen ha Loktudi. Hini 2020 ’vo e Plonevez ha Brieg! Treiñ a ra!
2018 :
Ur brezegenn war an divyezhegezh, un "abadenn-enklask", ur pred "kig ha fars", ur Fest-Deiz gant dañsoù Breizh ha Bro-Gembre : sed amañ petra oa program eil Gouel Vroadel Bro-Gembre aozet gant Kuzulioù Gevellañ Kerne Izel ha Ti ar Vro Kemper. Tud e-leizh, plijadur hag imor vat, tud a-youl vat niverus hag efedus, hag ur c’henurzhiañ direbech etre ar c’huzulioù…. Petra lâr, ma n’eo ket : "DREIST" !
Sadorn, 2e30 g.m., e Plogoneg : prezegenn Cefin CAMPBELL, dilennad e Kuzul Konte Caerfyrddyn, ezel ar Burev Erounit, e karg eus ar C’humunioù hag an Aferioù Maeziat. Digoret eo bet ar brezegenn gant Lena LOUARN, Besprezidantez Kuzul Rannvro Breizh, e karg eus yezhoù Breizh. Dirak ur c’hant bennak a selaouerien en deus Cefin CAMPBELL displeget ar raktres nevez divizet gant Gouarnamant Bro-Gembre evit tizhout, da vare 2050, ur milion a Gembraegerien.
Mersi bras da Gefin ha Mari CAMPBELL da vezañ deuet betek Plogoneg daoust d’an amzer fall spontus a rae e Bro-Gembre ha Su Bro-Saoz : barradoù erc’h stank, riell ha stankoù amañ hag ahont war ar gourhent… Diolch yn fawr!
Sinañ Karta "Ya d’ar brezhoneg" (live 1) a oa bet divizet a-unvouezh gant Kuzul Ti-Kêr Plogoneg e miz Kerzu tremenet (2017). Gant ma oa bet rakwelet e teufe Lena LOUARN da Blogoneg evit kejañ gant Cefin CAMPBELL, eo bet divizet gant an Ti-Kêr sinañ ar Garta d’an 3 a viz Meurzh, war-lerc’h ar brezegenn.
Sadorn, 8e noz, e Pluguën : abadenn-enklask "Ur bleiz e-mesk e zeñved". Un hanter-kant bennak a zanvez-poliser o deus furchet evit gouzout gant piv e oa bet drouklazhet ur mesaer, e gi ha meur a zañvad da zeiz foar vras al labour-douar e Llanymddyfri. Eürusamant eo bet kavet an torfedour… Skipailhoù, 5 den e pep hini anezho, o deus aterset ar re a oa an diskred warno evit dont a-benn da zirouestlañ un itrik bet ijinet gant "Immersive Game".
Sul, kreisteiz, e Plogoneg, ur c’hig ha fars saourus ha fonnus evit 230 kouviad !
Ha da heul, evit kas ar boued d’an traoñ, dañsoù a Vro-Gembre gant Twm Twp, hag a Vreizh gant Jakez GUILLOU hag Alain WECKENMANN.